‘केसेस मागे घेतल्या नाहीत तर जिवंत सोडणार नाही’; अमृतसागर कुटुंबाला धमक्यांचा आरोप

 

सातत्याने हल्ले व धमक्यांचा आरोप; कुटुंबाच्या सुरक्षेसाठी पोलीस संरक्षण आणि संबंधितांवर कडक कारवाईची आनंद अमृतसागर यांची मागणी

एल्गार मराठी न्यूज 

धुळे : आनंदखेडा येथील अमृतसागर कुटुंबाला कथितरित्या सातत्याने धमक्या, हल्ले आणि मानसिक त्रास दिला जात असल्याचा आरोप करत आनंद दिलीप अमृतसागर यांनी धुळे जिल्ह्याच्या पोलीस अधीक्षकांकडे निवेदनाद्वारे तातडीने पोलीस संरक्षण आणि संबंधित आरोपींवर कडक कायदेशीर कारवाई करण्याची मागणी केली आहे. दिनांक १३ ऑगस्ट २०२६ रोजी हे निवेदन सादर करण्यात आले असून, त्याच्या प्रती मुख्यमंत्री आणि नाशिक परिक्षेत्राच्या विशेष पोलीस महानिरीक्षकांकडेही देण्यात आल्या आहेत.

निवेदनानुसार, १२ ऑगस्ट रोजी आनंद अमृतसागर यांच्या वडिलांना नवी गल्ली परिसरात काही इसमांनी अडवून शिवीगाळ केली आणि न्यायालयीन प्रकरणे मागे न घेतल्यास आनंद यांना गावात आल्यानंतर जिवंत सोडणार नसल्याची धमकी दिल्याचा आरोप करण्यात आला आहे. या घटनेनंतर त्यांच्या वडिलांनी तालुका पोलीस ठाण्यात एनसी दाखल केल्याचे निवेदनात नमूद आहे.

अमृतसागर कुटुंबावर पूर्ववैमनस्यातून आणि न्यायालयात प्रलंबित असलेले दावे मागे घेण्यासाठी दबाव आणला जात असल्याचा आरोपही करण्यात आला आहे. यापूर्वी तलवार आणि इतर प्राणघातक शस्त्रांनी हल्ले झाल्याचे सांगत, संबंधित प्रकरणांमध्ये भारतीय दंड संहितेच्या कलम ३०७ आणि इतर गंभीर कलमांखाली गुन्हे दाखल झाल्याचा दावा निवेदनात करण्यात आला आहे.

सततच्या कथित दहशतीमुळे कुटुंबाला आनंदखेडा येथील मूळ गाव सोडून सुरत येथे तात्पुरते स्थलांतरित व्हावे लागल्याचेही आनंद अमृतसागर यांनी म्हटले आहे. गंभीर गुन्हे दाखल असतानाही संबंधित व्यक्तींकडून धमक्या व त्रास सुरू असल्याचा आरोप त्यांनी केला आहे.

निवेदनात काही व्यक्तींच्या राजकीय व सामाजिक प्रभावाचा गैरवापर होत असल्याचा आरोप करण्यात आला असून, काही आरोपींवर यापूर्वीही गुन्हे दाखल असल्याचे नमूद करण्यात आले आहे. तसेच हल्ल्यांचे फोटो व व्हिडिओसह पुरावे उपलब्ध असल्याचा दावा करत, त्यांची निष्पक्ष चौकशी करून कायदेशीर कारवाई करण्याची मागणी करण्यात आली आहे.

या प्रकरणात आनंद सोमनाथ गांगुर्डे, दौलत सोमनाथ गांगुर्डे, कैलास शामराव अमृतसागर, तीर्थदास शामराव अमृतसागर, सतीष शामराव अमृतसागर यांच्यासह अन्य व्यक्तींचा सहभाग असल्याचा आरोप निवेदनात करण्यात आला आहे. मात्र हे सर्व आरोप अर्जदाराने केलेले असून, त्यांची स्वतंत्रपणे पडताळणी होणे आणि संबंधित आरोपींची बाजू समोर येणे आवश्यक आहे.

दरम्यान, कुटुंबाच्या जीवितास धोका असल्याने तातडीने पोलीस संरक्षण द्यावे, संपूर्ण प्रकरणाची गंभीरपणे चौकशी करावी आणि दोषी आढळणाऱ्यांवर कायद्यानुसार कठोर कारवाई करावी, अशी मागणी आनंद अमृतसागर यांनी केली आहे. तसेच भविष्यात कुटुंबातील कोणत्याही व्यक्तीच्या जीविताला धोका निर्माण झाल्यास त्याची जबाबदारी संबंधितांवर राहील, असा इशाराही निवेदनातून देण्यात आला आहे. या निवेदनावर दिलिप वामन अमृतसागर, छायाबाई दिलिप अमृतसागर, आनंद दिलीप अमृतसागर., सुनंदाबाई विजय अमृतसागर, विजय सोनु अमृतसागर, गणेरा अशोक अमृतसागर, संभाजी विजय अमृतसागर, मेहुल अभिमान अमृतसागर यांचे नाव आणि सह्या आहेत.

यांचे नावं आणि सह्या आहेत